政情：陳淑莊膺立會廚神
嚟緊十幾個月香港有幾項重要選舉，各黨派都整裝待發，準備上場作戰。六個黨派嘅立法會議員尋日先嚟一場前哨戰，現場硝煙四起、不過就完全冇火藥味，只得一陣又一陣嘅笑聲，因為尋日其實只係一場烹飪比賽，結果由「立法會第一美女」公民黨陳淑莊（Tanya）勝出，而且今次原來已經唔係佢第一次攞冠軍添！
尋日活動由扶康會同中電合辦，每位立法會議員都要夥拍一位智障人士參賽，議員們平日口舌便給，不過烹飪就認真有心無力。好似街工梁耀忠咁，差啲煎燶晒啲雞翼，好在佢拍檔醒目提醒佢先冇事。社福界議員張國柱同樣煮得麻麻，由佢負責煎嘅三文魚氣味好腥，幸好佢拍檔煮嘅蘑菇汁夠香搭夠咋。
比賽結果由Tanya勝出，其實佢前年參加同一比賽已經攞過一次冠軍，今次佢煮泰式生菜包，賣相香氣都一等一。原來佢當年考會考有報家政一科，成績係點佢唔記得喇，不過肯定唔會低過C喎。Tanya仲話，自己平日都極愛食泰國菜，不過就好少親自煮，近年鍾意煮意粉多啲。