政情：邱副自爆阿媽霸公屋

香港傑出學生協會尋日喺香港大學搞高峰會，請咗邱副演講，有百幾個中學生參加。邱副一開波就自爆住過公屋︰「嗰陣屋邨比較狹窄，三百幾呎住七個人，每人得四十呎，依家叫擠迫戶喇！」佢話自己一直住到讀大學才入住學生宿舍，仲話佢住嗰棟公屋有三、四個朋友仔都入大學，「許冠傑、郭富城、鄧麗欣佢哋都喺屋邨長大㗎，公共房屋可以令生活冇咁好嘅階層向上移動。」

不過，有女學生問邱副對復建居屋嘅睇法時，邱副就話以前建居屋係畀一啲富裕嘅公屋家庭購買，從而改善生活，又可以騰出公屋，但佢話近幾年申請居屋嘅公屋住戶，只係為咗佢哋嘅子女買樓搬出去住，但父母就繼續住緊公屋。邱副先前先話過佢阿媽仲住緊公屋，真係自打嘴巴，原來佢係想搵自己做一個活生生嘅霸住公屋嘅例子，唔怪得政府唔肯復建居屋喇。

對於年輕人埋怨難買樓，邱副就話，呢兩年多咗年輕人想買樓係因為利息超低，覺得可以保值嘅就好貴都會爭住買；至於中產唔買樓唔係因為無錢，只係諗住可能遲啲會平啲啫。有志買樓嘅英皇仔黃同學就唔認同副局長嘅講法︰「好多中產買樓係為咗自住，唔係保值，原本想睇下政府有乜措施，依家我諗要撞正經濟危機、樓價勁跌先有機會買到喇。」睇死政府幫唔到市民置業。

不知圍城苦 風涼話死撐

邱副講完公屋，即被同學質詢居於偏遠地區公屋交通費貴問題。沙田天主教郭得勝中學學生孫志超質問︰「天水圍、東涌啲公屋居民搬咗入去係一個困局，出外交通同工作點呢？」邱副就扭橫折曲話，只係啲居民經常出市區啫，又話居民可以負擔到啲交通費，仲死撐話偏遠地區公屋環境好，好過住市區啲唐樓喎！既然咁好住，點解邱副唔叫阿媽搬入天水圍或東涌？佢名副其實係無厘頭是但噏，咁樣倒米法，當局真係多得佢唔少囉！