中環出更：胡曉明錫身半年驗血一次
近期高官頻頻病發入院，令到健康話題成為全城熱話。香港專業及資深行政人員協會尋日同嶺南大學搞咗名人學生分享會，會長胡曉明自爆有糖尿病，所以會定期驗身，每半年就會驗一次血。而且佢間公司菱電集團都要求高級職員每隔一年要做一次驗身，咁做對於個人同公司大家都有好處。
胡曉明話，成年人應該由四十五歲開始定期驗身，事關通常呢個年紀開始有老花眼，意味身體開始老化，咁有心得，反映佢懂得珍惜身體。嶺大校長陳玉樹就話，雖然學校冇要求教職員一定要驗身，但佢以前喺美國工作時，習慣咗買保險兼年年驗身，可以
實各項指標，一有異常就及時跟進。
出席同一場合嘅港區人大代表羅范椒芬就自言好好彩，因為老公係醫生，所以就算一年做唔到一次體檢都唔使驚。唔通羅生可以日日幫佢檢查？羅太笑稱，咁又唔得，有啲檢查一定要去醫院做嘅。至於另一退休高官、平機會主席林煥光尋日現身沙田馬場時話，佢咁上下年紀，梗要定期驗身啦！
施榮忻體會爸爸苦心
尋日到馬場湊熱鬧嘅仲有百仁基金主席施榮忻（Jaime），佢話平時應酬多，食咗唔健康嘅食物落肚都唔知，所以會定期做檢查，同時咁做係對家人嘅承擔，所以佢去年都成功戒煙嘞。Jaime笑言，至今才明白爸爸施子清點解食得咁清淡喎。