中環出更：科大廿歲生日獲贈行星
科技大學前日喺會展舉行開心派對，廣邀海內外嘉賓慶祝廿歲生日。咪睇科大年紀細細，但成就非凡，好似行政人員工商管理碩士（EMBA）課程就連續多年冠絕全球，難怪現身撐場嘅已故全國政協副主席霍英東嫡孫霍啟剛話，有機會都想報讀喎！
當晚出席嘅嘉賓粒粒巨星，大家一齊見證科大第三粒行星命名儀式。當日中國科學院南京紫金山天文台將一粒編號202784嘅小行星，命名為「港科大星」，紫金山天文台副台長魯春林專程來港頒發紀念牌及證書畀科大，由科大校董會主席張建東、校長陳繁昌及科大「星之子」陳易希等人代表接受。
啟剛想讀EMBA
陳校長成晚笑到見牙唔見眼，仲踢爆協成行主席方潤華幫咗好大忙。講到啟剛都想報讀嘅EMBA，陳校長好驕傲話，呢個成就唔簡單，好似唔止有份打世界盃，仲係贏咗世界盃添，係屬於世界級㗎！
已累計向科大捐款達七位數字嘅方潤華，當晚同囝囝方文雄都現身撐場。方潤華話，佢同科大歷屆三位校長感情好好，今次係佢搵紫金山天文台搵粒星命名，作為科大嘅生日賀禮。原來當年科大成立前改校名，方潤華都有份畀意見，所以話佢睇住科大出世到長大，一啲都不為過。
除咗啟剛到場外，媽咪朱玲玲同弟弟啟山都有現身，三人有傾有講，感情好好。原來霍英東基金同科大合作喺南沙興建科技研究中心，項目仲入咗十二‧五規劃，難怪霍家人咁撐場喇！
卓妮