政情：金勞詹辯論無厘頭爆粗
立法會尋日開始一連兩日辯論「史上最廢」預算案，立法會金融服務界議員詹培忠力排眾議，獨撐呢份急轉彎嘅預算案。不過佢無啦啦將話題轉到去澳門，期間仲忽然爆粗，堪稱全日最無厘頭嘅發言。
金勞詹一面大鬧泛民主派反對派六千蚊，另一面質疑中產人士喺預算案中係咪真係無得益。講講吓，佢講到將香港同澳門比，香港引以為傲嘅金融業一年只帶來二百一十億印花稅收，反觀澳門一年博彩稅收分分鐘有九百億，如果香港都要開賭又會點呢？佢自問自答話：「咪被人鬧到死、通俗啲即係被人鬧到×街！」
難得嘅係，金勞詹爆粗時嘅語氣不慍不火。當然立法會主席即時制止佢，但金勞詹發圍話「好多議員講你無出聲」，之後為免再糾纏下去令自己蝕底，金勞詹改口講「PK」，然後繼續發言。金勞詹嘅專長就係望住個鐘，夠鐘就坐低，佢尋日嘅發言，啱啱講咗十五分鐘。