政情：選民力量「自爆」無牌籌款
以追擊民主黨及民協為目標嘅政團選民力量，大部分成員都係八十後，好識得利用各種網上工具自我宣傳，包括將啲活動嘅圖片同短片上網，不過有時就因而惹禍。我哋尋日收到讀者報料，話選民力量去年十一月喺大圍火車站外擺檔籌款，因冇申請相關牌照而畀警方檢控。報料人仲話，一般呢類罪行好難有足夠證據檢控，但由於選民力量將活動圖片，包括印有佢哋標誌嘅籌款箱連捐款都上埋網，令警方「證據確鑿」，冇得抵賴。
袁彌明話有苦衷
我哋問過唔少選民力量成員，但大多都支吾以對，唯獨前港姐袁彌明（Erica）就心直口快，承認佢哋擺街站時係冇攞牌籌款，但Erica強調佢哋係有苦衷喎。
Erica話，佢哋嗰次喺大圍搞嘅係選民登記活動，而非刻意籌款，「如果有市民主動捐錢，我哋冇理由將啲錢收入褲袋㗎？我哋已經特登將個籌款箱收喺枱底啦！」佢又話佢哋每次決定「出動」都非常即興，難以次次都事先申請籌款牌照。
選民力量主席林雨陽就話，作為負責人，至今都冇收到任何警方檢控通知，話要深入了解吓事件先可回應。其實無牌籌款若果真係告得入嘅話，都可以好大鑊，為免偷雞唔到蝕揸米，大家都係小心啲好。