政情：發叔忘我 變身反對派
立法會尋日開始一連兩日辯論「史上最廢」預算案，一如所料，呢個辯論成為泛民主派對財爺鬍鬚曾嘅批鬥大會，但估唔到建制派都輪流發炮，就連經常幫政府護航嘅鄉議局代表劉皇發都狂轟港府不是，話鬍鬚曾派錢都派出咁大風波，實在令人匪夷所思。發叔仲要怒插港府控制樓價不力，忽然變咗反對派咁。不過，港府好多大政策都經過行政會議，發叔鬧得咁過癮，莫非忘記咗自己係行會成員？
發叔一開腔就揶揄鬍鬚曾選擇注資強積金係「先機既失，攻守逆轉」，要扭轉被動局面及全身而退係非常困難嘅事，雖然出招後見勢色唔對即刻變招，但面對市民對政府期望愈嚟愈高，鬍鬚曾錯在捉錯用神，以為派錢就搞掂，搞到今日焦頭爛額嘅困局。發叔仲話派錢細節至今未出台，但就引起社會極大爭議，確係匪夷所思，「世事之弔詭莫此為甚」。
怒插控制樓價不力
及後發叔話鋒一轉，怒斥港府壓抑樓價不力，佢認為內地人來港炒樓好快會到臨界點，雖然施政報告唔畀以買樓作為投資移民條件有少少成效，但得一招係無法遏止內地人來港買樓嘅勢頭，仲話唔排除「內地人有買爆香港樓市嘅能力」。發叔建議政府要進一步規限，例如限制內地人購買某種價格以上嘅樓宇，甚至編配某類房屋，專畀香港以外人士購買，否則多多供應都唔夠應付內地人無盡嘅購買力喎！
發叔身兼行會成員都開腔喪鬧，證明「史上最廢」嘅預算案確實搞到天怒人怨，連自己友都諸多不滿，先會上演到呢場籠裏雞作反嘅稀有戲碼。不過，話分兩頭，預算案發表前進行咗幾個月諮詢，如果鬍鬚曾選擇注資強積金，行會冇理由唔知情，預算案落得如此慘淡下場，作為行會成員嘅發叔都責無旁貸。
另一值得深思嘅係現今行會成員態度，行會從來都係實行集體負責制，即係無論個人有乜立場都好，大家就要口風一致，唔可以公開批評。除咗發叔開炮外，另一行會成員鄭耀棠都有批評港府注資做得差，令集體負責制蕩然無存。雖然發叔摑咗鬍鬚曾一巴，令市民分外興奮，但佢呢一巴同時摑埋自己，唔知發叔自己感唔感覺到？