中環出更：大舊石一星期減五磅
天氣開始回暖，女士們為咗夏裝着得好睇都紛紛減肥，估唔到男士都一樣要減肥。做過六次「通波仔」手術嘅立法會議員石禮謙（大舊石），最近都話要決心減肥，咁啱得咁蹺，卓妮日前就見到佢嘅賢慧女友Lisa抽住袋法國著名銀器品牌Christofle嘅紙袋，莫非買定靚餐具留住大舊石喺屋企開餐，以便監控食量？
卓妮上周六下晝見大舊石同女友Lisa喺中環行街Shopping，期間路過立法會門外，見佢抽住袋Christofle銀器餐具嘅紙袋，雖然伊人唔肯講買咗啲乜，但就透露大舊石要減肥。Lisa話，大舊石體重二百磅，目標想減二十至三十磅，現時減咗一個多星期，已經減咗五磅，成績算唔錯喎！
女友爆料購iPad2送禮
其實大舊石自從一年前做過「通波仔」手術後，已經戒口食得清淡，相信今次減磅難度不大。Lisa又爆料，大舊石已搶購多部iPad2，除咗自用外，仲用來送禮，事關大舊石最鍾意送啲靚嘢畀朋友一齊分享喎。男友如此大方，相信Lisa都應該收咗唔少厚禮啦！
卓妮