中環出更：保良就職禮白Sir到賀成焦點

白Sir尋日執到正出席保良局就職禮，唔少總理老友上前恭賀佢榮休，仲爭住約佢食飯，難怪佢話退咗休，一啲都唔寂寞。白Sir話，現時每天都有跑步同游水Keep Fit外，仲日日睇報紙、上網，唔畀自己落後。原來白Sir早已訂好機票四月去日本充電，後來發生地震，又爆發核輻射危機，所以都係決定唔博嘞，留待暑期去歐洲旅遊。

講番保良新主席龐盧淑燕，尋日穿起Leonard花花上衣，襯埋老公送嘅花朵形鑽石鏈，搶晒鏡。總理「鯊魚女」陳細潔（Abbie）都唔執輸，着上中式唐裝，變身中國娃娃。加入保良五年嘅Abbie，今年有個新「朵」，叫「保良八妹」。事關由主席數起，論資排輩，佢排第八，所以叫「八妹」。Abbie八面玲瓏，呢個「朵」啱晒佢。

保良董事局請嚟醒獅助興，氣氛熱鬧。 （伍鎮業攝）

龐盧淑燕（左二）榮升保良主席，呂鈞堯（左一）、副主席梁寶珠（左三）及鄭錦鐘都戥佢開心。

蔡太為孖孫掃奶粉

日本食品面對核輻射污染，Abbie就話信賴檢測，照樣大啖食。同屬總理嘅玩具大王蔡志明太太蔡李惠莉都關心核輻射食品，地震後，佢第一時間為一對孖孫掃日本奶粉，一掃八箱，即係話存貨有六十幾罐，唔怕餓親孖B，做個廿四孝外婆。

蔡李惠莉話喺地震後為一對外孫撲咗八箱日本奶粉。

東華董事局成員賀完保良後，拉隊去食晏。左起：副主席陳文綺慧、堪輿學家蔡伯勵、主席張佐華、李鋈麟及總理張鳳秋。

副主席鄭錦鐘（Eric）日前亦榮升爺爺，新抱誕下第三個男嬰。Eric話，新抱餵人奶，毋須撲奶粉。反而佢自己買衫就相當苦惱，因為佢鍾情嘅Black Label男裝，香港冇佢嘅Size，每季要專程飛過日本掃貨，一口氣掃幾套西裝，成打恤衫同領呔，如今日本核災未平，惟有着住舊衫先。

保良就職禮完畢後，大家嗌肚餓，東華總理李鋈麟及博愛總理弟弟李鋈發舉手做東，請晒眾人去旗下食肆「飯堂」開餐，坐滿兩圍枱，熱鬧到極。

卓妮