發誓無造假亦盼天地有正氣
【本報訊】「好簡單，只要發現指紋係佢哋三個，就還我清白啦，官司點打、民事訴訟贏唔贏係第二件事，起碼我有清白先！我無造假！」陳振聰對○六年遺囑的鑑證結果耿耿於懷。三月十二日他更向警方報案，並促請警方公開○六年遺囑鑑證結果，他誓言：「如果係假，我就係自掘墳墓！」他希望「天地有正氣」，令他洗脫嫌疑。
希望公開鑑證結果
陳振聰早前發公開信鳴冤，試圖讓警方採取行動，向他公布鑑證結果。「當時我去報案都無帶律師去，當時我律師知道咗好緊張，一定要來，堅持要我唔答任何嘢，但我去報案，唔答嘢點得？任佢哋問囉！我接受警誡，錄咗一個鐘頭口供。」陳坦言，有人說他的做法是「將自己的後路都掘埋」，可他認為刻下最重要是討回清白，「我認為我係零風險，因為我無做過，警察唔會插贓嫁禍。」他相信，只要紙上發現Nina（龔如心）及兩名見證人的指紋，即可還他清白，但不知道警方的調查進展。
他堅定地說：「如果無佢哋指紋，可以懷疑我；如果有唔知名嘅指紋，又可以懷疑我啦；如果有對照唔到嘅指紋，又可以懷疑我；但係如果有佢哋三個嘅，咁就應該放我啦，係咪先？好簡單啦！」他自言很有信心討回清白。「我舂個頭埋去一定對佢（警方）有信心啦！」、「假使呢份嘢係假，我會變成報假案，係好嚴重，我就係自掘墳墓！」陳振聰說，如果「天地有正氣」，說的人應該與他一起促請律政司公開遺囑鑑證報告。