陳振聰傾情剖白 「小甜甜唔係太后我唔係太監」
在已故華懋集團主席龔如心千億爭產案中突然石破天驚冒出的商人陳振聰，走過四年的世紀爭產之路，如今連連重挫，昨日既被上訴庭駁回向終審法院上訴的申請，又要面對警方的追殺，前路茫茫。小甜甜曾經令這位看風水的窮小子一朝榮華富貴，而一紙遺囑又讓他腳踏浮雲。傳奇人物陳振聰，終於自揭神秘面紗，破天荒解密奇情人生，接受本報獨家訪問，將自己的大半生、龔陳私情的秘聞軼事、爭產動機等娓娓道出。本報將以系列報道，將陳振聰的心路歷程逐一呈現。
龔如心和陳振聰的一段地下情，滲透了廿多億元的金錢成分，後來引發的千億遺產官司，更令人聯想到「錢作怪」。陳振聰說：「佢（龔如心）唔係太后，我亦唔係太監，佢真係唔係買我！」他形容與龔如心的忘年戀是奇緣，不是建立在金錢的基礎上。但他承認，龔如心令他擺脫了貧困，改變了他的一生，只可惜這段情路崎嶇。龔如心病逝後，陳振聰因為爭產，又要接受另一個命運挑戰，「如果佢無錢，我哋會發展得更好，亦都無人出來爭產。」
自述感情生活「煲碟煮飯仔按摩」
「我好掛住佢。佢對我好好，同佢相處真係好開心。」陳振聰稱，仍然懷念二人共度的「絕對美好」時光。九二年他邂逅小甜甜，「佢（龔如心）鍾意我傻傻哋啦，我真係傻傻哋O架！」他說至今不知道龔如心為何愛上他，只能相信是緣分將二人拉到一起，「自從九二年十二月三日下晝第一次見面後，就開始約會，可能係佢本身生活另類，我嘅生活又另類。」
「由初初見面開始，佢就對我好好，我係好感激，因為我以前生活好困苦，我爸爸係私校教師，收入好少，一九八三年中風，之後屋企好困難，之後我出來做嘢又做得唔好，細佬妹做便利店、百貨公司，唯獨一個弟弟（陳振田）入到香港大學。」他說，最初只當龔如心是老闆，「龔如心對我好好，我出社會咁耐未遇過一個人對我咁好。」、「我哋都係鍾意傾偈嘅人，我哋感情慢慢出嚟。」他說：「我好鍾意同人傾偈，遇上龔如心，更加唔停嘴。」
陳又說，小甜甜與妻子譚妙清性格完全不同，「太太為人硬朗，唔可以同佢傾訴，秉燭夜談更加無可能，但係Nina會聽我講。」說到這時他又望了望客廳一邊的妻子。「初時夜晚十點鐘出來，大家討論吓公司嘢，跟住就無所不談，睇吓碟傾吓偈會留到半夜三、四點先走。」「一齊咗幾年，感情開始穩定，佢就要同佢老爺打官司，等到官司打贏，佢個癌病就爆發。」兩人的相處亦畫上句號。
他強調，和龔一起的生活非外界想像般古靈精怪，「唔係淨係幫佢按摩嘅，只不過係佢成日話頭痛，痛到想撼頭埋牆，我同佢按摩吓啫，我相信心理因素多於治療能力。」他形容龔的為人與外界看到的「大老闆」形象不同，「佢性格好傾得偈，好開心又鍾意玩，我哋一齊傾偈睇電視，佢話從來好少整嘢食，我叫佢煮飯我食，相處唔夠幾個月佢就煮飯畀我食，佢多數煲紅米飯，我就煮餸，其實個回憶真係好好。」
龔贈錢因「我有啲錢，你又太窮」
他說，二人生活簡單快樂，龔會陪他到西環看其兒時舊居，他又會陪龔一起到家鄉上海緬懷過去，「我哋之間絕非建基於金錢，但我知講出來無人信，會話我扮嘢，我唔會解釋」。至於在庭審期間，龔家對他的評論，陳振聰平靜地說：「人身攻擊我覺得遺憾，無理由話我係太監」，他說和龔如心的私情，被渲染了「錢」的元素，令整件事變得複雜，「我哋無存在過買賣」，又慨嘆「如果龔如心無錢，佢只係一個普通女人，我哋可能會發展得更加好。」
陳指龔如心並非外界所想般對錢好緊張，「大家以為佢好鍾意錢，其實佢對錢無大感覺。」她貪方便住在華懋頂樓，間睡房好細。他說，龔的口頭禪是「我有啲錢，你又太窮。」常常想「畀多啲錢我，想我發展事業，佢好唔鍾意我做風水，因為唔係企業家。」
陳振聰憶述到與小甜甜的恩愛點滴時，不時泛起甜蜜的笑容，他說二人「我好鍾意佢好欣賞佢，呢個係事實，係有真實感情存在，呢個係事實。」
他說律師曾經在庭上質問他：「你會愛上比你大二十年嘅女人？其實我真係好想駁佢㗎！唔通我愛比我細三十年嘅女人就得？」回首這段情，再看看現在，陳振聰嘆息若沒有涉及錢，結局會更美好。