行人路堆貨物食署懶理
商戶佔用行人路擺放貨物，食物環境衞生署被指疏於執法。阿發（化名）經常出入元朗鳳翔路一帶，發現上址常有貨物擺放在行人路上，「條路已經唔係闊，啲舖頭仲成日將啲貨擺喺度，一擺就擺足幾個鐘，直頭當條街係貨倉咁，真係唔明點解食環署唔理！」
食環署發言人表示，接獲本報轉介後曾派員調查，證實上址有小量雜物放於商店之外，經警告後店方已清理雜物，其後覆查時情況亦令人滿意。
不過，當區區議員麥業成卻直指食環署「賴皮」，常以「人手不足」為由推卸責任，「班街坊投訴過好多次，亦都話過好多次畀食環署知，但就從來未收過食環署執法嘅報告，條街咁窄，仲成日畀人當貨倉，行人有咩事係咪食環署負責？」