政情：鼓勵職業波 政府齋噏
民政事務局局長曾德成尋日接受政府新聞處訪問，主動提到未來會致力發展第三代仿真草足球場，仲會將香港嘅仿真草足球場由十五個增加到三十六個，滿足市民嘅需要。不過好可惜嘅係，局長隻字不提興建全新嘅真草足球場，球圈中人同學者都話，有當然好過冇，不過對香港隊同職業球隊嚟講就唔夠囉。
沙田足球隊班主兼立法會議員林大輝話，仿真草絕對唔可以取代真草，除非全世界正規賽事都統一晒踢仿真草啦，否則喺仿真草踢到曉飛都冇用，一落真草隨時適應唔到，而且對職業球員嚟講，踢真草嘅感覺始終唔一樣。佢仲話，仿真草場其實貴過真草，不過好處係保養容易囉。
浸會大學體育系副教授雷雄德亦話，以「普及化」嚟講，大量起仿真草場總算好事，不過如果從「職業化」角度去考慮，冇番多啲真草場認真唔似樣。總而言之，兩位專家嘅意見都係「有好過冇」，政府成日話鼓勵職業足運，唔知幾時先肯起多啲真草場畀香港隊同球會用呢？