政情：陳祖澤叫僱傭雙方多溝通
政府推最低工資，變成爛攤子，千瘡百孔有待修補，修補之前，勞資關係仲緊張過未就最低工資立法。
香港僱主聯合會早前登報紙，提醒僱主盡快釐清休息日及膳食時間，唔怕畀人話係無良僱主，惹來軒然大波，僱主聯會主席陳祖澤（John）更加成眾矢之的，但佢否認「教人做壞事」，認為僱主同僱員之間，應該坐埋傾偈，多啲溝通。
政府發最低工資指引嘅簡單又籠統，畀咗僱主唔少走法律罅嘅機會，有人就建議政府立法講清楚，面對呢個爭議性嘅話題，John另有見解，前日現身香港會食晏，繼續解畫。
打工仔未必冇議價能力
John話，最低工資嘅行業指引好難涵蓋各行各業，即使舉一萬個例子，都無可能覆蓋得晒，事關唔同行業有唔同背景，好難一概而論，要打破困局，僱主同僱員之間要坐低傾掂數。佢又話，制訂薪酬話事權雖然喺老闆度，但依家失業率低，搵工唔算難，打工仔未必冇議價能力，唔使諗得太悲觀喎。即係話東家唔打打西家，希望西家有飯鐘錢喇。