政情：卓永興避傳媒跌咗手機
一般打工仔近來最關心嘅，相信都係想知道最低工資實施後，自己嘅飯鐘同休息日有冇人工。勞工處處長卓永興近排四出解畫，可惜啲答案全部都模棱兩可，令到工會同工友都好唔滿意。卓永興尋日應邀出席職工盟活動，全程閃閃縮縮避開記者追問，最後雖然成功逃脫，但就唔見咗部電話。
話說尋日卓永興出席工人節活動，職工盟秘書長李卓人就帶佢參觀現場唔同嘅攤位，當去到一個整水晶甲嘅攤位時，有好事之徒就提議職員為處長寫上「我要有薪休息日」同「我要有薪飯鐘」等字句，卓永興面色一沉，即時耍手擰頭，最終只係肯喺手背寫上「勞工處」三個字。
高官電話或大外洩
巡完一圈後，記者一擁而上，點知卓處長即時速逃，仲大聲問門口喺邊。處長最後當然安然離開啦，點知佢助手事後打畀現場職員，話卓永興唔見咗部電話，問有冇人執到。工作人員聽到都愛莫能助，因為現場人多混亂，搵番機會好微。哈，唔知卓永興部機有冇加密呢？否則搞到高官電話大外洩，到時都唔知點收科。