政情：人民力量全面狙擊民協

現時民協喺深水埗區議會共佔九席，但要尋求連任卻非易事。上屆喺南昌北出選嘅梁欐，與神州青年服務社嘅梁漢華互相廝殺，最後以十四票之微落敗，畀民建聯鄭泳舜漁人得利。據悉，與人民力量同一陣線嘅神州青年服務社，今屆繼續拒絕同民協協調，更改派社長林偉棠親自出戰，「三強鼎立」局面再現，梁欐大有可能會重蹈自己四年前嘅覆轍。

此外，民協秘書長、上屆循石硤尾區入局嘅譚國僑及駐守龍坪及上白田嘅吳美，同樣面臨狙擊。據了解，人民力量已派出一位青年張本釗到該區「搞事」，周時出席論壇「踩場」力批民協之餘，更到處掛街板宣傳為參選鋪路。不過，最奇特係同張本釗出現喺同一街板上嘅，竟然係前民協成員、上屆立法會曾為專業會議梁美芬助選嘅甄啟榮，難怪有人質疑佢哋同建制派關係曖昧。不過，人民力量中人就宣稱，甄啟榮經已洗心革面，同梁美芬劃清界線。

多重夾攻 阿基選情危危乎

至於民協立法會議員馮檢基，早已計劃棄守麗閣、大有可能空降李鄭屋以填補去年因涉嫌穿櫃桶底而被革出民協嘅官世亮，有地區人士話，除咗「滷味男」錢偉洛外，毓民助理符偉樂近期喺該區動作多多，最後由「偉洛」定係「偉樂」負責狙擊阿基仍係未知之數，除非有黨友畀個實贏嘅好位畀佢選喇。而據聞醜聞纏身嘅官世亮仍對李鄭屋區依依不捨，故喺多名對手狙擊及建制派夾攻下，上屆只險勝對手幾十票嘅阿基，選情危在旦夕，唔怪得佢要大打告急牌。

人民力量出全力搞寸民協，選民力量則全力狙擊民主黨。聽講前DJ「慢必」陳志全已mark住李永達不放，頻頻到葵青區做嘢；知名度較高嘅「星屑醫生」歐陽英傑或「劉嗡」劉嘉鴻則會狙擊有意空降大坑嘅單仲偕；前港姐袁彌明就會到黃埔與黃碧雲及梁美芬「三女混戰」。前綫則會負責狙擊新東嘅黃成智，人選未定，但有傳曾喺中聯辦開香檳被捕嘅葉浩意會披甲上陣。

人民力量早前搞咗個選舉，選出最想邊個高官落台，結果尋晚揭曉，曾蔭權以三百幾票，大熱勝出。