中環出更：日本核災姚君達無影響
米蘭站老闆姚君達揀靚手袋有心得，亦愛養馬。佢愛駒「站站名牌」尋日喺沙田馬場出戰第四場，可惜四甲不入。日本核事故殺傷力漸浮現，姚君達慶幸未受影響。佢話，公司以內地及香港市場為主，早前米蘭站進軍北京開舖，嚟緊會擴充至上海，生意唔憂做。
不過鐘錶業界就冇咁好彩嘞。經營鐘錶業嘅工業總會副主席劉展灝，尋日入場捧團體馬「奪錶」場，「奪錶」喺第五場跑第二，佢老友冼雅恩匹「精奇」就跑第一，佢上前恭喜對方，順便湊熱鬧拉頭馬。但劉展灝為鐘錶業大吐苦水。佢話，日本出口唔少中價手錶機芯，地震後，生產線嚴重受損，部分腕錶廠商惟有急急轉訂歐洲機芯，成本因而大幅上漲。同場嘅香港鐘錶業總會主席朱繼陶就預計日本機芯喺供不應求下，中下價手錶有加價壓力。
尋日馬場仲有賭王公子何猷君及千金何超欣，為「爆冷」加油，猷君話，媽咪梁安琪唔得閒入場，派佢哋做代表。可惜「爆冷」四甲不入。