中環出更：田少受傷一度失憶
身兼自由黨榮譽主席嘅旅遊發展局主席田北俊尋日現身沙田馬場，見佢戴住黑超，左手拇指又包住咗。原來佢喺剛過去嘅星期三，喺佢自己嘅遊艇上被大浪拋起受傷，一度失去知覺，醒番之後有一段記憶亦一片空白。田少話，佢諗番起件事，都覺得幾驚。
國家旅遊局六位官員上星期訪港，星期三剛好有半日空檔，於是田少諗住盡地主之誼，招呼佢哋坐上自己隻遊艇Manhattan Express，原先預計嘅行程，係喺銅鑼灣上船，沿住維多利亞港向西行繞到港島南面，再到西貢觀賞六角石，然後喺西貢食午飯。田少自信熟悉海上情況，客人喺船上向住前方睇風景，佢自己就背住船頭，諗住沿途親身介紹。
腦水腫左手拇指骨折
艘船去到大潭附近遇到大浪，田少背住船頭睇唔到海面情況，所以毫無防備下，成個人被拋起。田少話佢記得自己被拋起嘅一刻，以為自己已被拋入大海，之後嘅記憶一片空白，竟然係有一段時間失去知覺。醒番之後，佢只記起自己喺的士上，正去緊醫院，但旅發局嘅同事就同佢講：「田生，係你自己行上的士嘅喎。」
的士送咗田少去養和醫院，醫生同佢檢查咗受傷嘅手，仲有腦同眼。檢驗結果係佢左手拇指骨折、腦部輕微水腫，引致雙眼睇嘢有疊影，住咗兩晚醫院，醫生話，腦部水腫需要一星期康復，骨折亦冇嘢可以做，等佢自己慢慢好。
講番尋日，係田少囝囝送佢嚟馬場，為愛駒「風雲武士」打氣，入場之後就由黨友張宇人扶佢落沙圈賞馬，暫時做住佢嘅盲公竹。田少愛駒最終四甲不入，佢睇完場馬就急急腳返屋企養傷。經過今次事件，田少話意外嘅嘢好難講，以後只可以盡量小心啲。
卓妮