港人出咗名愛心爆棚，賑災又好，扶貧又好，一向都係為善不甘後人。所以話，香港係名副其實嘅愛心之都。
不過咁，樹大有枯枝，族大有乞兒。近年以慈善為名嘅街頭籌款活動愈來愈多，無奇不有，令人眼花繚亂，難分真假。最令人擔心嘅係，如果有不法之徒博大霧，打着慈善團體嘅招牌，藉街頭籌款或者募捐活動魚目混珠，利用市民嘅愛心斂財，咁就真係大殺風景咯。
呢，好似前排嗰單港人社工淫辱雲南稚女案咁，就爆出孤兒院所籌善款不知所終嘅醜聞。部分慈善機構管理不善、財務混亂、籌款去向不明，類似醜聞愈爆愈多，你話唔擔心就假。
唔講唔知，原來港府一直都冇監管慈善籌款嘅法例，即係無王管咁解。早前有立法會議員質疑當局對慈善團體監管太粗疏，擔心會出現「劣幣驅逐良幣」嘅後果，影響慈善事業發展。議員力數港府監管四大漏洞，包括慈善機構註冊容易、籌款唔使交代用途、稅務局有權無責、濫批免稅申請等等。換句話講，如果阿貓阿狗成立一間所謂慈善機構，四方化緣之後，就算善款自己落袋，當局都冇佢哋符，你話係咪荒謬吖！
更得人驚嘅係，目前全港超過六千六百間按《稅務條例》營運嘅慈善機構，只有百幾間有向外詳細披露組織架構、財務狀況及善款去向。即係話，市民捐畀慈善機構嘅錢係咪恰當使用，有冇畀人上下其手，根本無人知。
仲有一樣騎呢嘢係，規管籌款活動政出多門，賣旗要向社會福利署申請，賣獎券就關影視處事，涉及喺公眾地方賣貨就要搵食環署，如果臨時佔用官地又要向當區地政處申請。愈多部門管，表示愈冇人管，皆因權責不分，你推我讓，結果三個和尚無水食，乜都做唔到。
最近法律改革委員會轄下專責小組完成檢討報告，建議效法英國等地，成立獨立法定機構「慈善事務公署」，統一監管慈善團體嘅成立及運作喎。
又係法定機構？多隻香爐多隻鬼，唔好喇啩！事關市民聽見呢類疊床架屋嘅機構已經怕怕，辦事效率超低唔在講，隨時又變成獨立王國，好似平機會、私隱公署呢啲大花筒咁，未見成效先見醜聞，咁就認真該煨囉。
計功夫茶話齋，慈善團體監管甩漏多多，主要原因係港府部門側側膊互相卸責，如果社署、影視處、食環署等各司其職，盡到監管責任，又點會搞到七國咁亂吖。所以咯喎，與其成立乜嘢法定機構，不如自己做好呢份工好過喇！