政府施政無能，從「史上最廢」預算案到近日最低工資如何具體落實，全是急就章，完全沒有深思熟慮，搞到風波四起，民怨沸騰。
煲呔曾及其管治團隊真係「有口皆悲」，把好事變壞，像「交津」、「最低工資」完全違背原意；把好事變得更壞，豪派六千又問題多多，亂咁動用「關愛基金」扶貧嘅錢派畀新移民。虧財經事務及庫務局局長陳家強一味做錄音機，話「派錢可以藏富於民」，咁嘅理財常識，同邱騰華對「鈈」的認識一脈相承，即係「摩羅差騎膊馬，差上差。」
政府嘅管治，真係史上最亂，究其因，就係假諮詢。好似鬍鬚曾個人騷勁嘥八十五萬公帑，卻視民意為耳邊風，對高樓價、貧富懸殊一籌莫展；不理民情、漠視實際環境，又加汽車首次登記稅平均一成半，搞到車行嗌晒救命，老朽架「錢七」想換部環保車為「藍天打打氣」都要拖住，鬍鬚曾係罪人。
至於狂加煙稅四成，除了影響全港報販收入，私煙激增，不法分子牟取暴利，對減低煙民數目冇幫助。吸煙者多基層市民，佢哋吸了多年，根本唔會考慮吸煙是否危害健康，政府狂加煙稅危害佢哋嘅荷包，才是煙民最痛！
政府應理不理，好似任由油魔作怪，加快減慢，尋且變本加厲。政府不理民間聲音，如開放市場實施競爭法，或設立委員會，訂出調價機制，可政府就是縱容油魔噬人，坐視通脹如斷線風箏！民生多艱，高官無心做事，市民苦上加苦也。