美孚居民今日發起「千人瞓街」行動，抗議有發展商喺當地興建屏風樓，多個泛民主派政團都有派人參加，包括民主黨、公民黨、民協及人民力量。原來呢四個政團都喺當區存在選舉利益，究竟佢哋真係為咗班居民福祉定係選票，真係得佢哋自己先至知。
美孚新邨一共分為三個區議會選區，當中最受擬建屏風樓影響嘅美孚南選區，現任議員為原屬民主黨嘅王德全，但原來佢早前已靜雞雞過檔咗去公民黨，一下子撬起晒民主黨喺該區多年來嘅工作。為免啲支持者畀公民黨搶晒，民主黨今日就特別派出元朗區區議員鄺俊宇山長水遠「空降」美孚撐場，希望可以減少損失。
民協嘅候選人上屆喺美孚中選區僅以百多票之差落敗，今屆自然想捲土重來，加上有居民質疑擬建嘅屏風樓係當年民協喺深水埗區議會睇漏眼，所以該黨惟有派出立法會議員馮檢基去瞓街補鑊。人民力量嘅立法會議員黃毓民本身來自九龍西，據聞佢哋仲游說緊一名原屬社民連嘅美孚居民，好似王德全咁退黨過檔參選區議會，再者瞓街一向係佢哋專長，當然唔可以缺席啦！