政情：雷張慎佳斥官員怕事
防止虐待兒童會前總幹事雷張慎佳今個月正式退休，但佢關心兒童權益三十年所凝聚嘅熱誠未有退卻，尋日喺港台《香港家書》中繼續鞭策政府，不點名炮轟部分政府官員及民間團體「馬虎因循、為人膽小怕事、表面化」，以為少做少錯，有錯就推到別人身上，不敢向當權者發聲，實在令人難過及憤怒，結果阻礙咗家庭同社會發展。
促設兒童事務專員
究竟雷太暗批緊邊個，佢並冇明顯暗示，但香港經常有虐兒事件發生，肯定就係雷太嘅眼中釘，不除不快。
雷太又話，現時兒童問題愈趨複雜，所以要求政府設立兒童事務專員，以制訂兒童事務機制，保障小朋友權益。
不過，雷太話多年來亦喺社會上遇到好多有心人，為兒童權益「從黑髮做到白髮、從健康做到病」，寄語各方繼續齊心為兒童服務，落實暴力零容忍。