政情：陳國基入行誤打誤撞
日本大地震發生後，港府日日開記者會公布最新情況，鏡頭之前經常見到嘅「候任入境處處長」陳國基（KK），前幾日終於正式上任處長，並安排尋日同傳媒茶敍。
過程似報名選港姐
唔知係咪入境處工作太悶，KK對住記者十足開籠雀，仲透露投身入境處嘅來龍去脈，自爆出生草根家庭，除咗貪入境處套制服靚外，仲係同學幫佢攞埋入職申請表，入行過程誤打誤撞。
KK八二年喺樹仁學院（樹仁大學前身）畢業，佢話當年有個同學拎咗張入境處助理入境事務主任嘅入職申請表畀佢，叫佢一齊申請入職，點知最後佢個同學唔成功，反而佢就得咗，呢個情節真喺夠晒「港姐佳麗報名」咁雷同。雖然KK嘅入職過程有啲誤打誤撞，但更加誤打誤撞係佢升職做處長，事關之前仲有兩個助理處長排喺佢上面，只係因為有唔同原因令佢加快上位。
KK升任處長前做過多個職位，包括機場出入境、簽證，又係首批駐京辦入境處官員，但最特別就係做過新聞組，處理過居英權、無證媽媽衝入入境處事件，佢當年仲上過電台客串做節目主持添，多年來與傳媒關係保持良好。