政情：李君豪沽日債展神技
日本大地震除咗令數以萬計日本人家破人亡，亦令到全球唔少投資者損失慘重，不過已故全國政協常委李東海嘅囝囝、東泰集團主席李君豪（Vincent）就有驚冇險，佢竟然喺海嘯來臨前幾小時，已經掌握到地震喺太平洋逐步加劇嘅速度及力度，朝住日本方向震過去，及時沽晒持有嘅一間日本保險公司債券，勁過本港嘅天文台多多聲。
日前我哋喺一個酒會見到Vincent，佢係港交所董事，家族企業又以金融投資為主，話佢係投資專家絕對冇錯。Vincent講起今次驚濤駭浪嘅奇遇，仲心有餘悸，直呼好好彩。原來佢啱啱喺地震前兩日買入嗰批日本債券，咁啱佢同高盛行家講緊電話，對方話畀佢聽太平洋有地震，佢立即上Google
住，發現地震愈嚟愈密、愈嚟愈強，兼且愈嚟愈接近日本，於是喺三十分鐘內沽晒批貨，仲要分幾間投行去做，結果賺少少唔使蝕。
投資者唔可以放假
Vincent跟住開咗個兩小時嘅會議，出返嚟至知發生世紀地震及海嘯。總結今次經驗，佢話最緊要科學化、有秩序咁理財。咁做咗投資決定咪唔可以放假？佢直言：「係架！」