政情：周一鑊「煲茶論」又惹禍
公立醫院前線醫生不滿公院待遇差兼長期人手不足，令佢哋要不斷加班影響服務質素，於是發起連串抗爭行動，惟食物及衞生局局長周一嶽早前居然反責班醫生「斤斤計較」，最後搞到要公開道歉。不過事隔唔夠幾日，周一嶽又故態復萌，尋日出席一項公院活動時，聲言自己當年做實習醫生時要日日煲茶畀部門主管飲，而且每三日就有兩日要當通宵更，好似暗寸緊依家班醫生唔捱得苦同唔識尊重上司咁。估計佢繼「周斤斤」呢個花名之後，好快又會畀人叫做「周煲茶」。
周一嶽尋日重返自己做過行政總監嘅伊利沙伯醫院，出席微創手術中心嘅啟用儀式。佢致詞時自爆當年都係喺伊利沙伯醫院做實習，當年做三日要通宵兩日，工作苦不堪言。佢實習半年之後，終於有機會轉去外科專科受訓，但由於資歷最淺，日日都要幫部門主管煲茶飲以示尊敬，直到一年後有新人加入先唔使佢煲茶喎。
周一嶽雖然冇講到明，不過弦外之音明顯就係揶揄緊依家啲公院前線醫生唔捱得苦，偶爾加吓班就嘈到拆天，同佢之前嘅「斤斤計較」論同出一轍。唔通佢上次道歉道得好過癮，好想再嚟多次？
周一嶽嘅煲茶經歷，喺當年舊式社會相信一啲都唔出奇，但傳到落新一代醫生雙耳度，就會覺得周一嶽係咪寸緊佢哋不分尊卑、唔識得擦鞋，膽敢挑戰醫管局、政府同佢自己。周一嶽一而再、再而三咁挑釁同貶斥前線醫生，唔通佢真係想佢哋集體上街抗爭甚至發動大罷工，累到香港啲基層病人冇醫生睇先安樂？
胡定旭寸周擦鞋上位？
緊接周一嶽致詞嘅醫管局主席胡定旭就表示，自己當年做初級會計師時，都要幫上級斟茶遞水煲咖啡，不過就唔似周一嶽咁煲煲吓就煲到做最年輕顧問醫生，之後更先後做過兩間龍頭醫院嘅行政總監，最後仲榮登局長寶座添，呼籲啲年輕醫生要學吓局長咁煲壺靚茶喎。不過就唔知佢究竟係真心讚緊周一嶽，定係代班前線醫生寸番對方靠擦鞋上位喇！