中環出更：錢大康入港大等足40年
能夠成為百年歷史嘅香港大學天子門生，係唔少莘莘學子嘅夢想，當年無法圓夢嘅港大首席副校長錢大康，前晚出席港大學生會（HKUSU）就職典禮時，直言為入港大足足等咗四十年。不過，錢大康如今一入港大就做副校長，又可以同成班學生後輩融洽相處，卓妮相信佢即使做唔到學生坐喺港大演講廳聽書，都應該無乜遺憾喇。
錢大康坦言，年少時去球場多過上學堂，直到考唔上大學，逼住到美國升學，先至開竅發憤讀書。修讀電機工程嘅錢大康，七九年取得博士學位之後，就入咗美國太空總署高達太空飛行中心做研究工作，之後又擔任威斯康辛大學（麥迪遜）電機及電腦工程教授，再回流返香港成為科大創校元老之一，及後過檔港大做副校長，終於入到港大校園。
謝凌潔貞考AO貪方便
至於由大學一年級已開始加入學生會嘅教育局常秘謝凌潔貞，一路上莊到大三，最難忘開會由傍晚六時開到凌晨四時，之後大家去飲埋早茶再直落返學，不但冇影響學業成績，而且因為時間少咗，令佢更加珍惜時間，好好讀書。除咗搞學生會外，謝太仲要幫人補習賺外快，仲要抽時間拍拖，所以佢笑言當年考AO（政務官），都係貪填張申請表就搞掂，慳番時間寄求職信喎。