中環出更：鄉局新大樓入伙「冤家」碰頭
鄉議局位於沙田石門嘅新大樓終於落成，但內部設施仲未裝修好。不過，局方就趁尋日好日先舉行入伙儀式，現場冠蓋雲集，好多鄉紳都畀面撐場，特別早前喺村代表及鄉事委員會選舉對壘嘅候選人共冶一爐，好似鄉議局主席劉皇發同屯門鄉委會新主席何君堯、副主席林偉強同坪洲鄉委會新主席黃漢權等。梗係啦，鄉議局六月換屆，邊個入主新大樓都未知，梗要齊心合力搞好新大樓入伙先啦！
何君堯發叔喜相逢
對政途充滿理想嘅何君堯，尋日以一身Causal Look出席入伙儀式，一到場就即時好熱情同發叔握手，噓寒問暖，完全唔似外間傳聞話佢哋因為爭奪屯門鄉委會主席個位搞到冤家路窄面左左。不過，由於何君堯係新人上場，對於鄉紳們始終較為陌生，各自竊竊私語，卓妮就聽到有鄉紳之間嘅對話：「呢，嗰個咪係同發叔爭主席嘅何君堯囉！」
何君堯除咗踩入鄉議局外，現任律師會副會長嘅佢直言嚟緊五月有機會參選會長一職，希望有機會服務業界咁話。除咗新人何君堯外，成功取代林偉強做坪洲鄉委會主席嘅黃漢權尋日都以當然執委身份出席，但就唔見佢哋有特別交流。黃漢權笑笑口話，自己一直喺坪洲打躉，將來到市區開鄉議局執委會認真山長水遠，但為街坊做嘢遠啲都冇所謂喎。
成功連任上水鄉委會主席嘅侯志強都有現身，反而被佢擊敗嘅「食力簡」簡炳墀就冇到場湊熱鬧，其他多名落選嘅鄉紳都唔見影，可能現場多人得滯，卓妮睇唔到啦，但總括來說都係只見新人笑。此外，鄉議局副主席張學明提到，新大樓將來會開放畀市民參觀，政府亦計劃喺正門外興建主題公園配合新大樓，佢有信心會為香港增添一個新景點。
卓妮