香江有冤，六月飛霜。警察又涉嫌砌生豬肉，老屈一位的士司機講粗口，而奇怪嘅係，雖然法庭最後還呢位司機清白，但兩位懷疑夾口供屈人嘅執法者竟然獲司法機構放生，真係匪夷所思。唉，唔怪得香港烏煙瘴氣，冤案如山喇！
擊鼓鳴冤者係的士司機吳先生，事情發生喺○八年底，佢當時接載咗兩名男子往深水埗警署，途中由於拒絕衝黃燈，雙方發生口角，為此結怨。其後一名男子表露警員身份，並質疑吳先生未有展示司機證，事件最終驚動警方調停。正所謂，寧得罪小人，莫得罪差人，本來口角之爭，只係小事一樁嘅啫，過咗咪算囉，點知三個月後，吳先生突然接獲法庭傳票，除被檢控無展示司機證，仲加上無禮貌及不守規矩嘅控罪，成為現代版嘅竇娥冤。
元代雜劇中嘅竇娥含冤受刑，而司機吳先生則誓不低頭，拒含冤受辱。審訊期間，辯方發現兩名警員嘅口供疑點重重，包括行文九成相似，幾乎搬字過紙，最離譜嘅係連記錯車牌號碼亦一式一樣，你話係咪開玩笑吖？結果，呢宗三歲細路哥都知點判嘅案件，糾纏咗十三個月，司機吳先生先至獲撤銷控罪。不過，佢除了使咗五萬幾蚊律師費，仲浪費咗無數時間同精力，箇中冤屈，何處昭雪？
正如的士業界人士話齋，今次好明顯係有人懷恨在心，涉嫌夾口供砌生豬肉，點知法庭一念之仁玩放生，而律政司亦冇採取行動，咁搞法，仲有司法公正可言？再講，如果有人涉嫌夾口供都冇事，日後冤案豈不是陸續有來？
講開又講，香港話就話係乜嘢法治社會，其實，司法維護權貴已經見怪不怪咯，遠嘅唔講，終院法官包致金姪女Amina摑警案，就係最佳例子。Amina涉嫌多次襲警，法官竟以佢嘅學歷同家庭背景良好為由，輕判了事。事實證明，香港嘅法治根本係掛羊頭賣狗肉，唔止官官相衞，仲係權貴相衞添。
大律師龔靜儀話，吳先生可以循刑事及民事途徑追究，包括要求律政司調查警員是否妨礙司法公正及身為公職人員行為不當，並可透過民事訴訟追討律師費、堂費及精神損失。而監警會副主席李國麟就認為，吳先生應盡快向投訴警察課投訴，並知會監警會跟進，確保調查過程公平、公正。其實，計功夫茶話齋，受害者嘅經濟損失固然要追索，但更重要係要討回公道，伸張正義，唔可以放過任何枉法之人，否則，香港法治嘅招牌遲早不保！