政情：白韞六做監工巡地盤
今年係入境處成立五十周年，啱啱卸任嘅前入境處處長白韞六，過去卅三年青春都係貢獻咗畀入境處，自然夠輩分緬懷一番，佢最難忘係一九七八年入職入境處，第一年就畀人派去守羅湖口岸，當年關口係「三無」，即係無冷氣、無電腦同無「ｅ道」，但唯一不變嘅係勁多人。
白Sir話，當年啲人慣用擔挑，挑住前面一籮後面一籮，若遇到熟人叫住，擰轉身回應「咩呀？」入境處櫃枱嘅同事實被擔挑打中。佢亦難忘農曆新年羅湖要一早就開關，凌晨兩、三點佢就要起床到指定地點集合，預備四、五點開關，有時夜晚收工，佢就索性喺會議室瞓覺，慳番交通時間。
另一樣嘢令佢好深刻嘅，就係被委以「重任」，有份籌建九○年落成的灣仔入境事務大樓。佢話施工期間，經常要巡地盤，由地下行到上廿五樓，逐層睇，由彈線、設計間隔到插蘇位都要跟進，「無諗過加入入境處要負責呢啲工作！」白Sir巡地盤巡足幾年，佢話回想起都感覺好有趣。