政情：「倒曾小英雄」再狠批當奴
夢想成為特首、喺青協論壇上單挑港鐵主席錢果豐嘅中五學生李佳斌，尋日接受電台節目訪問，再次狠批曾蔭權需要為本港各樣深層次矛盾負責，又認為港府扶貧不力，搞到喺香港呢個富裕社會仍然有露宿者、好多幾十歲嘅老人家為兩餐仍然要去執紙皮，仲話自己若果做到特首，第一時間會去幫呢批最有需要嘅人，認真有大志！
李佳斌話班高官身處高位，每月領取超高薪酬，但做嘅嘢就少之又少，不過最值得批評嘅肯定係曾蔭權，因為佢身為政府最高話事人，最應該對香港負責嘅就係佢，香港依家有咁多矛盾同問題，大家唔應該鬧啲局長，反而要直接向曾蔭權反映，因為佢冇真正體察到市民嘅需要。
李佳斌話，自己從未參加過遊行示威，平時鍾意做義工，自己對政治嘅興趣來自睇歷史書，從歷史中可以睇到一個模式，就係好多領導人年輕時都胸懷大志，憂國憂民，但到真正手握權力後就用盡辦法剷除異己，行為同年輕時有天壤之別。曾蔭權最叻就係用人唯親，唔知李佳斌係唔係暗諷緊佢呢？