政情：田二少兔仔上身探小朋友
新民黨副主席田北辰明年喺新界西參加立法會直選已經幾堅決，可能做開生意關係，諗頭特別多，繼上一次參演《窮富翁大作戰》掃街瞓籠屋後，尋日又有新搞作，趁住兒童節同復活節將近，扮到成隻兔仔咁去元朗元崗村幼稚園探小朋友，班小朋友玩得開心之餘，佢自己亦樂而忘返。
二少話，自己好鍾意小朋友，奈何平日工作太忙實在冇時間，自己又唔似阿哥自由黨榮譽主席田北俊咁可以含飴弄孫，所以今次真係玩到唔捨得走。二少仲話，呢間幼稚園之前因為差啲請唔到校長而面臨結業，不過今日見到，學校辦得好成功，學生亦由五個加到廿個，佢睇見咁亦相當感動。
同學仔收文具好開心
除咗扮兔仔外，二少尋日亦帶咗唔少文具畀班小朋友，呢班學生大都家境麻麻，收到新文具當然開心啦，二少仲同嗰位熱心校長傾咗好耐，睇吓有冇邊啲地方可以幫到間學校添。佢仲強調，自己喺元朗未有辦事處，所以今次同選舉係兩回事，希望大家唔好拉埋嚟講喎。