政情：青委會吸新血加入80後

許曉暉放風 刻意安排

講到明係青年事務委員會，工作好自然就係專門就青年事務向港府出謀獻策啦。尋日公布嘅委任名單之中，好多個都有豐富處理青年事務嘅經驗，而且最重要係個個都年輕有活力，好似律師簡汝謙同匯賢智庫鄺禹韜咁，兩位就真真正正係八十後，另一位律師車偉恒就係香港青年獎勵計劃副主席、馮丹媚係青協副總幹事，至於灣仔區議員伍婉婷亦都長期關心婦女同青年事務，講履歷可以話合晒格。

以往政府好多時都將呢類公職視為政治酬庸，好少好似今次咁既搵啱年齡、又搵啱履歷，相信政府亦已經意識到，舊有一套對現代年輕人已經冇效。呢個推論唔係捕風捉影㗎，民政事務局副局長許曉暉舊年年初已經親口講過，會吸納更多年輕人加入青年事務委員會，所以話今次委任係刻意拉青年人入諮詢架構係萬分真確嘅。

鄭汝樺「限時fb」貽笑大方

政府知衰當然係好事啦，以往政府根本唔會去主動了解年輕人需要啲乜，亦唔會明白年輕人諗緊乜，結果就搞到憤青一批又一批咁湧現，如果唔係接連發生幾件激烈嘅抗爭事件，相信政府仲以為香港嘅年輕人好滿意依家生活。好似運輸及房屋局局長鄭汝樺咁，口口聲聲話會同年輕人對話，結果就搞個「限時facebook」出嚟貽笑大方囉。

青年事務委員會主席陳振彬同我哋講，佢自己同新加入嘅委員之前已經有接觸，佢哋全部來自唔同界別，亦有唔同職業背景，相信可以帶到唔同聲音入個委員會咁話。當問到佢係唔係刻意搵年輕人入嚟時，陳主席即時笑笑口話唔關事，因為佢哋搵人年齡唔係主要考慮因素，最緊要係搵關心青年工作嘅人啫！

點都好啦，今年新獲委任嘅委員全部都年輕有為，希望佢哋真係可以客觀咁畀到意見政府，做多啲有創意又吸引到青年嘅活動，捋順班年輕人嘅怒火，否則搞到大批年輕人上街遊行示威絕食抗議，到時咪盞大家無癮！