中環出更：台港青年才俊打成一片
近期本港青年組織愈來愈蓬勃，幾十名港台青年才俊日前喺皇朝會舉行第一次台港青年聯誼餐會，除咗臥虎藏龍嘅台青踴躍出席之外，以香港菁英會骨幹為主嘅港青亦傾巢而出，大家由生疏玩到盡興而歸，仲約定下次再聚添！
今次飯局由台籍商人亞洲聯合財務（UA）董事總經理長原彰弘撮合，佢話自己喺香港定居三十四年，經常請台灣年輕人食飯聚會，但一直冇定期或者固定組織促進台港交流。早前佢同香港菁英會主席白富鴻講起，於是促成今次聚會。當晚先由長原老細做東請食飯，然後白富鴻再請大家去酒吧唱K作樂，一眾後生仔好快打成一片。
當晚出席台青不乏政商界第二代，包括前中華旅行社總經理鄭安國公子鄭同明、日本救心代理商泰山企業老闆林添茂兒子林斯亮，長原老細嘅愛子長原京毅同埋佢太太都喺度。菁英會除咗白富鴻之外，一眾副主席莊家彬、楊華勇及盧金榮都嚟到，經濟動力立法會議員林健鋒囝囝林凱章亦現身撐場。