中環出更：性感超蓮揀戰衣氹媽咪
何家四房分產風波圓滿解決，賭王何鴻燊鬆一口氣，何家上下亦歡顏再現。乖乖女超蓮亭亭玉立，着衫風格愈來愈少布，更趁春天製造小驚喜，氹媽咪陳婉珍開心。
冇行街一排嘅超蓮，尋日愚人節獨自去Shopping開心吓，逛中環置地名店BCBGMAXAZRIA睇衫。天氣啱啱轉暖，拎住鮮紅Dior手袋嘅超蓮，已經急不及待穿起白色性感小背心、杏色短褲，大晒修長美腿。
超蓮一臉自信行入BCBG不停試晚裝。期間，佢睇中一條藍色超短裙，試上身後滿心歡喜走出店舖大鏡前左照右照，條裙凸顯超蓮豐滿身段及白滑美腿，Fit晒身，但超蓮睇嚟十五十六，揸唔定主意，揀完一輪，都係換番衫走人。
愚人節四出整蠱朋友
卓妮上前打招呼，超蓮直認要揀衫去Ball，事關東華下周一舉行新一屆董事局就職禮，媽咪以副主席身份亮相，身為何家淑女，又點可以失禮？當晚喺君悅仲有Ball，超蓮想成功搶鏡，當然要花心思。係咪選定BCBGMAXAZRIA晚裝裙，佢露出鬼馬表情話：「未知㗎，到時你咪知囉。」話口未完，超蓮行埋Valentino睇衫，揀到啱為止。
甩拖嘅超蓮，生活一樣精彩。身邊雖未有新追求者，但溫書考試，夠晒佢忙。尋日趁愚人節，四出整蠱朋友，佢沾沾自喜喺微博留言話：「作弄人還全都成功！」認真調皮。
卓妮