最低工資搵笨　公僕無權加薪

嗱，大家千祈唔好以為功夫茶反應過激呀，實在係事出有因。正所謂無功不受祿，今時今日公務員何德何能接受加薪嘅俸祿？遠嘅施政失誤都唔同你計較嘞，就講講即將實施嘅最低工資法例。呢一條法例邊個負責執行㗎？公務員囉，之但係最低工資竟然係搵笨嘅，咁你話做官嘅有乜嘢資格要求加薪先！

最低工資話就話規定時薪不得少於二十八元，理論上所有草根階層打工仔都會加薪。問題係官老爺辦事作風一向甩皮甩骨，勞工處居然冇講明食飯時間以及放假日子必須計薪。咁就出現一條闊過未來政府大樓「門常開」嘅法律罅，冇耐前之嘛，香港僱主聯合會刊登廣告公然教唆剝削員工，提醒僱主修改合約扣除飯鐘錢同有薪假。

眼見香港僱主聯合會變咗「無良僱主學堂」，正常嘅梗係喝住佢唔好胡作非為啦。哈，點不知勞工處走去助紂為虐，確認無良僱主嘅行為並不犯法，只係假慈假悲咁講兩句話，勞資兩方慢慢傾掂條數啦，唔好咁無良就得㗎嘞。

好嘞，既然最低工資搵笨，草根階層打工仔未必受到保障，即係公務員失職啦，點解要加薪畀你呀？唔減薪都偷笑咯。

根據公務員嘅講法，薪酬趨勢調查係參照上一年度嘅私人企業加薪數據，可能會出現滯後情況，令建議加幅低於今年嘅實際通脹率。所以咯喎，高級公務員協會及警察評議會職方協會分別去信公務員事務局局長俞宗怡，要求釐定加幅之時考慮通脹及調查滯後等等因素，加幅不少於百分之六。

計功夫茶話齋，臉皮夠厚有時真係幾有用㗎，你睇吓呢班得寸進尺嘅厚臉一族，普通加薪都嫌太少，竟然奢望加薪幅度高過通脹。

環顧今時今日嘅人力市場，有邊個打工仔咁幸福可以加薪高過通脹㗎？有得加已經要劏雞還神啦，夠膽同老闆討價還價嗰個，隨時準備加入失業大軍都得咯。

講番最低工資吖，五月一日法例生效之後，一旦無良僱主真係鐵石心腸利用法律罅剝削員工，係就係加薪呀，不過幅度隨時遠遠不及百分之六。如果你係稍稍有人性嘅公務員，見到自己嘅施政失誤而連累人哋三餐不繼，你都唔好意思成個病態港孩咁獅子開大口啦。

總而言之，最低工資搵笨，公僕無權加薪！