政情：出選超級議席嫻姐心大心細

一直對是否參選超級區議會議席猶抱琵琶半遮面嘅工聯會元老陳婉嫻尋日話，最近多咗人游說佢出山參選，搞到佢心大心細。嫻姐認為，做立法會議員成日開會好困身，但大權在手，做嘢自然有效率得多，所以正處於兩難局面，揸唔定主意，總之就係三心兩意。咁嫻姐幾時會扑錘決定呢？佢就神神秘秘咁話要再思考吓，但相信八、九月就一定確定到人選喎。梗係要及早決定喇，區議會選舉十一月就舉行囉喎。