政情：政府溝淡撐居屋聲音？
香港樓價急升，社會要求復建居屋嘅聲音亦愈趨高調，就連由患上「八萬五恐懼症」嘅煲呔曾委任嘅房屋委員會，都有愈嚟愈多委員撐居屋，所以唔起居屋呢個講法，隨時會失守。港府尋日公布新一輪房委會委員任命，就增加咗專業人士嘅比例，唔知係唔係有意無意要溝淡裏面嘅撐居屋聲音。
今次任命有十名舊委員獲再度委任，七人新委任，但同期卸任嘅委員只有四位，即係多咗三名委員，令整個房委會嘅非官方委員數目增至廿六人。
卸任嘅包括三名立法會議員，分別為民主黨嘅李華明、專業會議嘅劉秀成同衞生服務界李國麟，由民主黨議員黃成智、保險界議員陳健波同社聯行政總裁方敏生接任，另一舊委員工銀亞洲董事副總經理黃遠輝，就由經濟動力成員、盤谷銀行高級副總裁孔令成接替。但新增嗰三名委員區嘯翔、孫德基同劉文君，就全部來自會計或建築專業，唔覺有乜政治或基層背景，未必會支持復建居屋。