政情：陳繁昌着愛因斯坦上身
上世紀最偉大嘅天才科學家愛因斯坦好多人都識，但原來佢同香港頗有淵源，科技大學校長陳繁昌話，愛因斯坦曾遊香江，仲同依家嘅訪港遊客一樣，去過山頂一遊。
香港科學館、科大同瑞士駐港總領事館等下月起至八月舉行一系列「愛因斯坦在香江」活動，陳校長着住印有愛因斯坦樣貌嘅Ｔ恤話，原來愛因斯坦於一九二二年偕太太坐郵輪由法國馬賽去日本神戶時，曾喺十一月九日到過香港，仲上過山頂參觀同到淺水灣酒店high tea添！當時報章有記載，愛因斯坦對太平山頂美景印象深刻，仲話令佢諗起家鄉瑞士！佢係喺離開香港到上海期間收到自己獲頒當屆諾貝爾物理學獎嘅喜訊，所以翌年回程時愛因斯坦伉儷再臨香港，到猶太會堂與同胞共聚。
雖然哲人已逝，陳校長都不忘鼓勵香港學生學習愛因斯坦嘅好奇心，佢仲話，原來愛因斯坦平時最鍾意食芝士同士多啤梨沾忌廉。唔知係咪食多啲就可以聰明啲呢？