政情：奧馬冇人示威 侯志強有功
上水鄉事委員會選舉早前爆出涉嫌賄選醜聞，事件涉及五屆冠軍練馬師簡炳墀，分外惹人注目。事後有報道話現任鄉委會主席侯志強想將依家上水鄉事委員會招牌旁邊「簡炳墀題」四個字拆咗，仲講到佢好意氣風發咁。侯志強早兩日呼冤，話拆字建議係由其他村代表提出，唔關佢事，希望大家唔好誤會佢喎。
講開鄉委會，原來侯志強辦公室裏面有一張「百鳥朝鳳」刺繡，睇真啲原來早幾年時任奧運馬術公司總裁嘅林煥光送畀佢嘅。侯志強話，當日上水要搞奧馬比賽，主辦者擔心法輪功學員到場示威，令比賽出現混亂，所以向佢求助。結果真係冇人示威，林煥光事後就送上刺繡畫，答謝佢有份出力喎。問佢有咩好方法阻止人示威，佢笑笑口話：「神明庇佑囉！」
侯志強仲話，自己做嘢夠實力又上心，一係唔做、一做就一定要成功：「我做嘢係靠實力，唔通靠『食力』咩？」咦，唔通別有所指？