政情：河蟹飯局變嗌交大會
為咗維持建制各黨派大和諧而產生嘅定期飯局變嗌交大會。話說尋日建制派照例開飯，仲約埋署理特首唐英年出席，諗住大家飲吓紅酒happy吓，點知最低工資同飯鐘錢嘅問題撻着咗勞工界代表李鳳英、葉偉明同飲食界張宇人（Tommy），三方激辯咗十幾分鐘，最後要唐唐出面調停先搞得掂。
為最低工資激辯
有與會者透露，Tommy一開波就咬住最低工資嘅問題唔放，大鬧政府立法前睇漏眼，先會衍生扣飯鐘錢同無薪休息日嘅問題。不過Tommy又幫僱主開脫，話唔可以怪僱主無良，在商言商都係好自然嘅事。Tommy講到一半，英姐就忍唔住打斷佢，直斥有僱主賣廣告教人扣飯鐘錢係「撩交嗌」，葉偉明亦幫埋口，情況差啲一發不可收拾。唐唐見狀即刻做和事老，話反正已經立咗法，依家應該多啲討論勞資合作嘅問題。
雖然三人就最低工資嗌大交，但大家亦就增加汽車首次登記稅達致初步共識，佢哋同意如果喺預算案公布前簽約買車、新車換舊車或買環保車，全部都可獲豁免加稅。
至於煙草稅，有人建議分三期提高，唔使市民一下子咁難接受。唐唐就循例話返去反映議員意見。