政情：食日菜撐場周一鑊冇影
港人向來喜歡食日本菜，但隨着日本核危機威脅蔓延，大家對魚生、壽司都避之則吉，日本食肆生意大跌。自由黨飲食業議員張宇人（Tommy）眼見業界陷入水深火熱，前日急發英雄帖，邀請一眾高官、同僚去食日本菜以示支持，但主事官員食物及衞生局局長周一嶽同佢班手下卻以有工作在身為由而無一人赴約。當年港人喺孔雀石綠毒魚流入本港期間聞魚色變，港府自掏腰包搞淡水魚宴以示對業界支持，今次港府卻係有議員發起都唔去現吓身，唔通真係驚有輻射？
Tommy尋日率領十一位立法會同僚去位於灣仔嘅大亞味工房日本料理大快朵頤，當中民建聯最為捧場，黨主席譚耀宗、議員劉江華、黃定光（象哥）同葉國謙都有到，人民力量黃毓民同陳偉業、中總黃宜弘、總商會林健鋒、金融服務界詹培忠、民主黨李華明（肥仔明）亦畀面出席，公民黨陳淑莊（Tanya）則成為唯一女將。
落柯打多嗌豬扒牛肉飯
向來鍾意食日本菜、聲言一周至少食兩次嘅Tanya，自從大地震發生後，已有兩星期冇食過，但佢聲言唔係因為怕輻射喎，「我內心好大掙扎，又想去食日本嘢支持佢哋，但又好似同佢哋爭食咁！」單刀赴會嘅肥仔明就聲言佢班黨友唔係「怕死」，只係因為有工作喺身而嚟唔到。
出名識飲識食嘅象哥就未驚過，鯨吞壽司後聲言「咩都唔怕，最怕冇得食」；詹Sir就揚言「你敢賣，我敢食」，為本港嘅食物安全同日本食肆大打強心針。不過話雖如此，唔知點解班議員落柯打時，都傾向嗌豬扒飯同牛肉飯等菜式，可能對魚生點都有啲心存顧忌。
埋單計數，今餐盛惠二千三百蚊，由「領隊」Tommy出錢、大亞老闆許威望出酒。許生話，受地震影響，佢嘅日本食材批發生意額跌近四成；而由於鮑魚同鮮帶子都源自地震重災區岩手縣，故賣一隻少一隻，仲大爆早前有大豪客一擲九萬蚊買走四箱鮑魚，但相信未來唔會掀起炒風。
Tommy就話，希望今次班議員帶頭食日本菜，可以重建港人信心，仲話可惜商務及經濟發展局局長劉吳惠蘭正在院休養，否則佢會力促當局喺呢個關鍵時期向受影響食肆、廠商同旅行社發特別信貸畀佢哋「救急」。
