中環出更：黃英琦獲頒院士全家捧場
香港教育學院尋日頒授榮譽院士銜畀六位對香港教育同社會有貢獻嘅人士，包括西九諮詢委員會委員黃英琦、蘇浙小學創校校長孫方中同埋前全國人大香港代表團團長吳康民。能夠得到教院嘅榮譽院士，對教育工作者嚟講係莫大榮耀，佢哋嘅大批家人同朋友都有到場打氣，其中又以排隊爭住同吳康民拍照嘅人龍最誇張，高峰時有近百人圍住佢，認真夠面子。
其中一位主角孫方中今年雖然已經超過八十歲，不過睇嚟保養得宜，望落起碼比真實嘅年齡細二十年。蘇浙小學係全港第一間用普通話教學嘅學校，孫校長當年咁有遠見堅持要用普通話教學，佢話全因為一顆愛國心，因佢堅信全國咁多種方言，如果冇統一語言，國民根本冇得溝通，咁又何來進步呢？
不過原來咁多年教育生涯之中，一直講唔好廣東話令到孫校長好尷尬。佢話，廣東話真係好難學，加上以前自己一手創立嘅學校都講普通話，反而令佢自己失去講廣東話嘅語言環境，所以即使依家講廣東話仲係「麻麻哋」。
黃英豪遲到企門口
尋日典禮散場後先見到有「新金王」之稱嘅金至尊主席黃英豪，佢身為黃英琦細佬，有出現本來唔出奇，但因乜一直企喺門口唔入去呀？原來，黃英豪尋日朝早要為一個簽約儀式做見證人，儀式一完即時入大埔教育學院捧家姐場，誰不知入到去，典禮已經開始咗喇，為免影響典禮進行，只好乖乖企門口等完場囉。
黃家尋日總動員出席撐大家姐黃英琦，除咗黃英豪外，爸爸、媽媽，同埋其餘三兄弟姊妹都有到場。黃英豪好自豪咁話，五兄弟姊妹每個星期至少會搵一日同父母飲茶食飯，即使大家都已經成家立室都冇改變，乜都會以家人為先。
黃英豪身為「新金王」，唔知佢會唔會送舊金畀家姐做禮物呢？金王就話，屋企人係講心唔講金嘅，冇嘢畀親身出席重要喎。
卓妮