政情：阿涂換iPad 2浪費新功能
舊年iPad一出，即時引起全城搶購，今年輪到iPad 2降臨，唔少潮人不惜一擲千金，除咗早買早用，仲可以喺朋友之間威威。用開iPad嘅立法會議員涂謹申尋日攞住部iPad 2開會，莫非佢都變成潮人用家？
阿涂話，其實係佢有朋友喺美國買多咗一部64GB、WiFi版白色iPad 2，問佢有冇興趣換機，阿涂見送到上門咪換機囉，佢都只係以原價大約五千五港元買，絕無炒賣成分。
用咗iPad 2幾日嘅阿涂，暫時只能對個保護套讚不絕口，因為個套嘅設計非常方便好用。不過阿涂亦自爆，其實佢多數用iPad睇電郵、上網、睇雜誌，所以用途同舊機分別不大，iPad 2新增嘅影相拍片功能更唔係十分用得着。咁似乎有啲浪費咗部iPad 2喎，不過阿涂能夠緊貼潮流，相信有助同年輕人溝通嘅！