甜瓜着火驅魔

紐約人告別6連敗

賽前6連敗正值低潮嘅紐約人，今場有安東尼挺身而出，第三節「着火」單節獨得19分，可惜「甜瓜」在第四節完結前兩次起手都「炒粉」，無法為球隊絕殺要進入加時作賽。不過，魔術在加時期間先有領袖杜域侯活第6次犯規被罰離場，其後隊友陶告魯及艾爾奇勒亦步其後塵6犯被逐，令魔術內線形同虛設，紐約人最終贏7分。

約翰禾爾領巫師贏爵士

安東尼今場打出加盟紐約人後新高39分，另貢獻10個籃板，而隊友史杜迪米亞就攻入20分及9個籃板。盛傳同「甜瓜」不和嘅史杜迪米亞，賽後大讚安東尼有料到，全靠佢「着火」先可以終止連敗。紐約人贏波後仍排東岸第七，魔術則續排第四。

同日巫師亦要激戰加時，作客以100比95擊敗爵士，幾經辛苦終於取得今季第二場客場勝仗。雖然易建聯今場續任正選，但只得6分，而今季狀元爺約翰禾爾就攻入全場最高28分，成為贏波最大功臣。爵士輸波後嘗到6連敗，打入季後賽機會愈見渺茫。

本報綜合報道