尼采說：凡是墮落的，都應該推倒！對於炮製「史上最廢」預算案嘅鬍鬚曾，再推出「史上最撲朔迷離」的亂派錢方法，鬍鬚曾說：凡是阻住我吃飯的，都應該推倒！
鬍鬚曾宣布派錢至今已三個多星期，老朽高興到唔知使凸了多少次六千元，可鬍鬚曾仍老神在在，派錢細節依然欠奉，立法會解畫又係顧左右而言他，議員要求佢多留一會解答問題，即發晦氣：「我仲有嘢要做，我未食飯！」
做高官做到鬍鬚曾咁架勢，下台都無憾今生矣！「枵腹從公」睇怕唔會出現係佢嘅從政生涯。鬍鬚曾深明「民以食為天」的道理，佢理財鹵莽，貪杯及好吃倒可以做一個食家！
不過，如果根據國人「食乜補乜」嘅邏輯，鬍鬚曾即使吃上一打燉豬腦，都補唔番佢「史上最廢」預算案嘅恥辱。佢與財經事務及庫務局局長陳家強可謂一對活寶貝，兩人應該成日食蛇羹，懶到成條蛇日夜冬眠，否則冇理由拖足三個多星期，依然說不出派錢的大概，十八歲如何界定！
兩位高官一唱一和，陳家強表明下月中預算案三讀表決前，都唔會有派錢細節；鬍鬚曾就威脅話：若議員不先通過預算案，市民收不到六千蚊會好失望！難怪有議員妙喻其派錢方案猶如搞「一夜情」——冇責任冇長遠承擔，最弊就係有手尾跟。鬍鬚曾的「一夜情」最弊冇激情，有的只是派錢都茫無頭緒！幸好佢思想簡單，絕不會「繚亂春愁如柳絮，依依夢裏無尋處」！大家不妨耐心等佢食多十餐百餐，大概會有點靈感寫下艱難便秘一筆。