政情：網民最想邊個落台？
由社民連創黨主席黃毓民另起爐灶成立嘅人民力量，將於下周日聯同前綫、泛民同選民力量等合作夥伴，於尖沙咀百周年公園舉行起動大會。據悉，當日節目密麻麻，將會由朝玩到黑，焦點將會係一個名為「不該！我最想佢下台大獎選舉」，畀當晚出席嘅市民即場「公投」，選出佢哋認為最應下台謝罪嘅高官。
選民力量成員現正喺網上收集網友意見，睇吓邊位高官最應「落車」走人，最後五強將自動進身起動大會當日嘅決賽。我哋尋日睇過，上榜嘅高官不外乎嗰幾位，「起錨超錯」嘅曾蔭權、「唔鍾意食粟米班塊飯」嘅財政司司長曾俊華、「霸王硬上弓」迫令英皇書院縮班嘅教育局局長孫明揚、聲言「結婚唔使買樓」嘅運輸及房屋局局長鄭汝樺等高官統統榜上有名，但向來作風低調、時被人「數漏」嘅中央政策組首席顧問劉兆佳，卻因「臨界點」言論出爾反爾成為大熱，更獲唔少網友「點名力撐」要佢下台。究竟邊個勝出，星期日就知。