政情：任志剛無意再做公務
前金融管理局行政總裁任志剛前年卸任之後，一直退而不休，佢係中國金融學會執行副會長，又係建設銀行非執行董事，仲係中文大學工商管理學院名譽教授，非常活躍，不過被問及佢會唔會再做公務，佢諗咗兩秒，答謂「唔會喇」。
任志剛接受本港一間電子媒體訪問，佢話自己對於金融財經一直都好有興趣，當國家同特區需要佢，佢都願意畀意見，但係佢會記住自己已經退咗落嚟，所以有意見都唔會公開提出。被問到小市民「上車」買樓嘅問題，佢就話如果唔持有一層自住嘅樓係好不智嘅，至於投資買股票，佢就叫市民不時要做壓力測試，評估吓自己可以承受風險嘅能力。
人才難求，肯做公務嘅人才更少，久不久都有傳聞話任志剛會再喺特區政府出任要職，包括做特首都有人講，不過喺訪問度，記者點到即止，問佢會唔會再做公務，佢就話唔會喇。世事難料，特別喺政壇，乜嘢都好難講得埋嘅。