政情：象哥扯線幫工聯撲水
工聯會轄下嘅工人醫療所早排得到善長大手捐出二百萬，畀佢哋拓展更全面嘅醫療服務。工聯會尋日為首部流動中醫醫療車舉行啟動禮，不過最特別嘅，原來嗰位捐款嘅善長係由有「工聯會姑爺」之稱嘅立法會進出口界議員黃定光（象哥）穿針引線介紹畀工聯會，象哥尋日出席活動笑到見牙唔見眼。
象哥太太係工聯會副會長林淑儀，今次象哥出心出力幫手搵到國基集團主席朱國基捐錢畀工聯會，令到呢部流動中醫醫療車順利誕生，服務街坊，象哥可以話應記一功。呢部車睇落普普通通，其實裏面有候診區、針灸床同輪椅升降台，可謂麻雀雖小，五臟俱全。
尋日出席活動嘅仲有工聯會會長鄭耀棠，佢前一排做完頸椎手術，尋日睇佢身體已經靈活番好多，棠哥話自己行路同上樓梯都已經冇乜問題喇，係落樓梯要就住就住，主診醫生亦話最少要半年至九個月先可完全康復，所以佢都唔會心急喎。