政情：自由黨換Logo破舊立新
○八年喺立法會選舉地區直選全軍覆沒嘅自由黨，今年決定重新上路，前主席田北俊、同前副主席周梁淑怡（莎姐）相繼復出撐黨，前排更加決定「引刀成一快」，連個黨徽都換埋，立誓將舊有形象徹底打破，注入更多年輕活力，尋日佢哋仲特登搵公關公司搞咗個新黨徽發布會，可見係幾咁重視呢一次改革。
今次已經係自由黨成立以來第二次改黨徽，今次同之前分別好大，以藍綠兩色為主，據兩位著名設計師陳幼堅同盧永強講，藍色代表專業和穩重、綠色就代表環保，而個設計概念亦以「自由」為綱要。請得郁兩位名設計師，所費一定不菲啦，陳幼堅就話佢同莎姐識咗好多年，今次効勞，只係一餐茶價錢喎。
尋日個新黨徽一出，即有在場人士話感覺好似某間銀行咁。黨榮譽主席田北俊就話，自己同個黨都畀兩位設計師好大自由度，用色同設計佢完全冇所謂。自由黨青年團尋日都出晒嚟支持個活動，主席李梓敬仲爬埋上黨車度影相添，認真充滿活力喎！