政情：港府Hea驗輻射遲早大鑊
日本核輻射危機繼續升級，影響範圍更不斷擴大，向來處事慢半拍嘅港府卻繼續定過抬炸彈，衞生署署長林秉恩尋日仲堅持唔為來自日本嘅旅客做輻射驗測。特區政府先係聲言毋須強制檢驗日本進口貨物，及後驗出貨品「出事」，至急急腳禁止來自日本部分地方嘅奶類製品同蔬果進口，並承諾加強抽驗，但已難保部分輻射產品流入市面。咁都未算，有化驗業界嘅朋友更向我哋爆料，話現時本港嘅化驗所，其實對檢測輻射嚴重缺乏經驗，大家都係初哥，摸住石頭過河，作為升斗市民唔驚至奇。
大亞灣核電廠已運作多年，雖然話大核比起日本福島嘅核電廠構造安全好多，但畢竟大核就喺香港隔籬，本港對核輻射竟然全無警覺性，現時絕大多數化驗所對檢驗輻射嘅實戰經驗更近乎零，故今次日本突如其來爆發核事故，絕對殺咗化驗業界一個措手不及。據悉，向來驗開三聚氰胺、孔雀石綠及蘇丹紅等毒藥超標嘅本港化驗所，喺意外發生後，突然被委以重任驗輻射，當中不少要即時向外國專家求教，喺搵齊資料「自我增值」後先識做嘢。由於經驗不足，又缺乏專業人才，故港府要佢哋持續兼大規模地檢驗日本進口貨嘅話，驗費隨時狂飆至瘋狂水平，成本未必係港府當初所能預計。
名人買手提檢測儀自救
另外，雖然海關早前承諾會加強抽檢日本空運及海運進口貨品，特別係對食物同化妝品嘅抽查，但眾所周知，輻射呢家嘢無色無味無處不在，唔係話你食落肚、搽上面先會感染，只要該件貨品喺輻射範圍出現過，可能已經帶有輻射，好似依家咁Hea住抽驗糧食及藥物等貨品就交差算數，就遲早出事。
港府做嘢後知後覺，信佢幾多至啱呢？唔通最後市民統統都要靠自己，購物時要自行帶備手提輻射檢測儀，「嘟」過安全先買？難怪唔少名人，包括候任博愛總理王嘉恩都計劃跟隊、豪花六千至萬元買個檢測儀傍身。不過，並唔係你畀得起錢就得，聽講依家預訂嘅話，分分鐘要兩三星期先有貨，可見港人係幾咁「相信」政府。